上個月，西班牙已故獨裁者佛朗哥嘅遺骸喺一片爭議聲中，由烈士谷遷葬到佢嘅家族墓地。軍人出身嘅佛朗哥响1936年發動政變，經歷3年內戰之後，佛朗哥成立獨裁政權，一直掌權至1975年逝世。佛朗哥當初喺意大利總理墨索里尼幫助下打贏咗內戰，但到咗二戰，佛朗哥統治下嘅西班牙就保持中立，令西班牙可以免受戰火催殘。

喺1940年10月23日，佛朗哥同納粹德國元首希特勒喺法國會面，討論西班牙是否參加二戰。起初希特勒非常有自信，認為西班牙會加入軸心國，不過呢場會議未開始，佛朗哥就遲大到，令希特勒足足等咗成個鐘。較早前，佛朗哥就派出外交部長蘇涅爾提出條件，包括提供小麥同石油，以換取收回英屬直布羅陀海峽同得到法屬摩洛哥，由於希特勒覺得佛朗哥「獅子開大口」，於是促成今次會面。二人會面期間，希特勒表明會將摩洛哥同奧蘭分俾西班牙，換取西班牙以加納利群島作為軸心國潛艇嘅補給基地。

但佛朗哥就重申，內戰期間造成國內過百萬人喪生，再加上西班牙海岸線長，如果得唔到德國嘅援助，難以對英開戰，又指自己保持中立，意味住比利牛斯山前線唔會有盟軍喺度，就已經係幫緊納粹德國，之後希特勒多次對佛朗哥威逼利誘，佛朗哥亦都無動於衷，推搪了事。而事實上，佛朗哥當時就一直收受英國方面嘅賄賂，令西班牙同英國維持貿易，向英國提供彈藥，又承諾拒絕為意大利同德國嘅潛艇提供補給，佛朗哥嘅策略令西班牙喺二戰中免受戰火催殘，甚至攞到唔少著數。

1975年11月佛朗哥因為心臟病逝世，遺體就被安葬喺馬德里城外嘅烈士谷墓園裡面，墓園嘅其中一部分就係由佛朗哥統治下，被強制勞動嘅政治犯興建而成。除咗佛朗哥，烈士谷仲安葬咗1936年至1939年期間內戰中數以萬計嘅死難者，多年嚟呢度都係西班牙極右分子嘅聖地，直至近年社會民主主義政府上台之後，認為佛朗哥遺體葬喺嗰度，係對戰爭犧牲者嘅一種冒犯，於是提出將佛朗哥遷葬。

圖為佛朗哥，取自網絡。