呢排地鐵好多個站都臨時關閉又或者提早收車,一直搭地鐵返工、放工嘅秘書妹妹要改搭巴士,但秘書妹妹一向路痴,臨時臨急都唔知搭咩車好,搞到佢揦手唔成勢,要一班同事幫手指路先得。講起「揦手唔成勢」個「揦」字,有捉住、抓住嘅意思,至於點解同個「勢」字一齊講,據講係關戲台事。

「揦手」即係拎起衣袖,「勢」就係架勢、身段動作,喺戲台上嘅演員做戲前往往要「揦」好手勢、擺定個台型先開始演出。如果話一個演員「揦手唔成勢」,即係話佢嘅動作未到位,亦都用嚟形容佢未做好準備、應付唔嚟。

原圖嚟自網絡。