唔知有無人同阿史一樣,睇完《金宵大廈》覺得李施嬅嘅旗袍look好得?可惜宜家旗袍已經唔似以前咁係女性嘅常服,反而多咗禮服嘅功能,只有喺特定場合先見到。講起旗袍,本身係指清朝八旗嘅婦女長袍,滿族嘅袍服比較窄身,方便佢哋游牧、狩獵。辛亥革命之後,呢種滿族長袍同當代服裝流行元素結合成為旗袍,繼承咗清朝長袍寬闊平直嘅特點,但裙擺就去到小腿,露出足踝,係現代旗袍嘅趨型。

喺1929年,旗袍更加係國民政府規定嘅禮服,亦係女仔嘅其中一種校服。之後,旗袍仲成為唔同年齡、階層女性最普遍嘅日常服裝,再加上當紅女星胡蝶、阮玲玉、著名作家張愛玲、林徽因等都鍾情著旗袍,上世紀20至30年代可以話係旗袍最輝煌嘅時期。

至於點解旗袍嘅設計要喺裙襬兩邊開叉?據講係因為滿族女子經常要騎馬,呢個設計就方便佢哋上落馬咁話。

圖為1930年代著旗袍嘅學生,原圖嚟自網絡。