今年年頭阿史睇咗《孟買酒店》呢套電影，佢改編自2008年發生嘅一連串恐怖襲擊事件，講述泰姬陵酒店被一班恐怖份子闖入、見人就殺，酒店職員同旅客互相幫助下脫險嘅故事。呢一連串恐怖襲擊事件發生响2008年11月26日夜晚，有大約10名來自巴基斯坦嘅恐怖分子，喺印度孟買多處發動恐怖襲擊，造成160幾人死亡、超過300人受傷。

當晚，恐怖分子混入泰姬陵酒店展開屠殺，超過500名旅客同員工被困喺酒店入面，最終有31人死亡，當中有12人係酒店員工，佢哋唔少都係因為保護旅客而被殺。喺事件中生還嘅酒店主廚表示，有唔少酒店員工本來都已經逃出酒店，但最後都係返酒店拯救被困嘅旅客。

原圖取自網絡。