去年今日,美國前總統老布殊逝世,享年94歲。布殊响1989—1993年期間出任美國總統,而佢個仔喬治布殊亦响2001年至2009年做過總統,於是大家都習慣以「老布殊」稱呼佢,今日就簡單介紹吓佢嘅一生。老布殊生於1924年6月12日,18歲生日佢就報名加入海軍,二戰期間參與過太平洋海戰,成為美國海軍嘅魚雷轟炸機飛行員,參與過58場戰鬥,有一次佢乘搭嘅軍機被擊中墮海,喺海上漂流近4個鐘之後被美軍潛艇救起,生還回國。二戰結束之後,布殊喺大學攻讀經濟學,1953年同人合作創辦扎帕塔石油公司(Zapata Corporation),並且出任公司嘅董事兼總經理,直至1964年,布殊踏足政壇,開始佢嘅從政生涯。

1966年布殊當選國會眾議員,1971至1973年出任美國常駐聯合國代表、1974至1975年擔任美國駐北京聯絡處主任。到咗1980年,布殊參加美國總統選舉共和黨初選,輸咗俾列根,之後擔任列根嘅副手並且成功當選,喺列根1981至1989年兩屆總統任期內出任副總統。1988年美國總統大選,布殊擊敗民主黨參選人杜卡基思,當選總統。

「蘇聯解體」同波斯灣戰爭都係响布殊總統任期內發生。1990年8月,伊拉克前總統侯賽因發兵入侵科威特,由於科威特係世界主要石油產地,西方國家憂慮石油供應及價格不穩,美國就聯同歐洲多國喺聯合國授權之下,於1991年1月向伊拉克發動攻擊,同年2月迫使伊拉克由科威特撤軍,結束波斯灣戰爭。

但由於列根時期美國同蘇聯展開軍備競賽,以及爆發波斯灣戰爭,大大增加美國嘅國防開支,令美國出現財政赤字,當時美國經濟一度陷入連續6個月嘅衰退,嚴重打擊布殊喺1992年尋求連任總統嘅選情,結果就輸咗俾民主黨嘅克林頓。

圖片為列根、老布殊,取自網絡。