阿史有個表弟以前細個搭港鐵嗰陣，係咁問阿史佐敦站係咪紀念「籃球之神」米高佐敦，阿史聽完之後忍唔住係咁笑。佐敦站呢個名其實取自車站附近嘅佐敦道，而佐敦道呢個名當初就係紀念一位嚟自英國嘅病理學專家佐敦（Dr G.P. Jordan），今日就同大家介紹吓佐敦嘅事跡喇。

話說喺1894年，香港發生瘟疫，當病人病發嗰陣淋巴腺附近會有一塊核狀硬塊，當硬塊出現無幾耐，病人就會死亡，由於大家當初唔知疫症成因，就形容為「核疫」。後來，佐敦就喺醫院研究發現，呢種疫症係由細菌傳染而成，於是佢建議將傳染病區嘅屋拆走並進行消毒，終於成功暫時控制疫症。

直至1904年，呢種疫症再次喺香港出現，佐敦就建議英國派一位叫辛浦遜嘅細菌學教授嚟香港研究呢一種細菌。當時辛浦遜聯同幾位日本專家將疫區物品進行檢驗，最後喺死老鼠身上發現同樣嘅細菌，並證實細菌係經由鼠虱從老鼠身上傳俾人類。搵到原因之後，政府發起大型滅鼠運動，並改善衛生環境，成功控制疫情。

到咗1909年，政府整理九龍街道嘅時候，就將第六街改稱「佐敦道」，表彰佐敦。順帶一提，佐敦係1887年創辦香港華人西醫書院嘅發起人之一，並負責教授病理學，國父孫中山先生亦都係佢學生嚟㗎。

原圖取自網絡。