最近阿史睇到甄子丹主演嗰套《葉問4》嘅廣告，嚟緊聖誕節檔期就會上映，唔知會唔會再掀起一股「葉問熱」呢？而現實中嘅葉問，就係响1972年今日因為癌症，喺香港病逝，終年79歲，阿史今日就介紹吓葉問嘅一啲拜師學藝嘅經歷。葉問1893年10月10日生於佛山一個大富之家，當時葉家就將祠堂租咗俾詠春拳傳人、外號「找錢華」嘅陳華順做武館教拳。葉問6歲嘅時候見到陳華順教拳，就話想學，葉問媽媽考慮到葉問身體唔算強壯，覺得學吓功夫都無壞，於是就同意葉問向陳華順拜師學藝。

當時陳華順已經70幾歲，但佢非常疼惜年紀小小嘅葉問，有一次陳華順個仔偷咗佢啲藥書同武術書拎去典當，陳華順贖返嚟之後就索性送咗俾葉問。但好景不常，葉問跟陳華順學藝學咗3年幾，陳華順就與世長辭，彌留之際陳華順再三叮囑二弟子吳促素好好照顧葉問，可見陳華順對葉問幾咁好。

1908年，葉問嚟到香港，就讀赤柱聖士提反書院，校內有唔少英美學生欺負中國學生，佢哋見葉問生得細粒、斯斯文文，就嚟欺負葉問，點知葉問奮起反擊，將佢哋打到落花流水，自此葉問嘅功夫就開始出名，又引嚟校外嘅外國學生過嚟挑戰。有一日，有位同樣來自佛山嘅男仔，係南北行太子爺，佢話家中有位世伯聽講葉問識打詠春，就邀請葉問去南北行見面。葉問去到南北行之後，就同呢位世伯切磋，結果被擊敗，覺得好無面嘅葉問粒聲唔出就走咗。隔咗幾日，呢位世伯再約葉問見面，問佢想唔想學詠春，仲表明唔收學費。

原來呢位世伯就係佢師叔、詠春拳王梁贊個仔梁璧，於是葉問就一邊讀書，一邊向梁璧學藝，直至梁璧1911年逝世。

圖為葉問晚年，取自網絡。