尋日睇新聞見到著名音樂人黎小田離世，覺得好突然，明明無耐前先喺《流行經典50年》見到佢。阿史喺度希望佢一路好走之餘，亦都帶大家簡單回顧吓黎小田嘅一生。

黎小田原名黎田英，生於音樂世家；喺1973年，佢奪得無綫電視第一屆「作曲邀請賽」季軍，從此就開始佢嘅音樂創作生涯。好多陪伴住香港人成長嘅經典作品，包括《大地恩情》、《天蠶變》、《殘夢》、《人在旅途灑涙時》等，都係出自黎小田筆下。全盛時期，黎小田幾乎包辦咗當年麗的電視好多知名嘅劇集主題曲、插曲。此外，唔少香港樂壇巨星，例如梅豔芳、呂方、杜德偉等，都係由黎小田發掘捧紅，而張國榮嘅樂壇地位亦多得黎小田嚟奠定。唔講唔知，除咗作曲之外，黎小田原嚟仲係童星出身，佢5歲入行拍戲，參與拍攝《可憐天下父母心》等多部粵語長片，可以話係多才多藝。

除咗事業得意，黎小田嘅感情生活亦都多姿多彩。佢曾有過兩段婚姻，其中最為人熟知嘅係佢同關菊英嘅一段情，不過只係維持咗兩年。喺上世紀70年代，黎小田因為同薛家燕合作主持綜藝節目《家燕與小田》而結緣，兩人曾經秘密拍拖，但最終情深緣淺，兩人嘅感情昇華為知心好友。

如今斯人已去，但相信黎小田留下嘅無數流行經典，將繼續陪伴住一代代香港人。

原圖嚟自網絡。