上次講完捷克斯洛伐克响1993年分成2個獨立國家,今次就講吓當初係點樣成為一個國家喇。捷克同斯洛伐克喺第一次世界大戰之前,同屬奧匈帝國嘅一部分,分別位於奧地利同匈牙利勢力範圍。奧匈帝國喺一戰中戰敗解體,捷克同斯洛伐克就由奧匈帝國獨立出嚟,合組成一個國家。

捷克人同斯洛伐克人同屬斯拉夫人,早喺公元5至6世紀嚟到呢一帶居住,初年同屬薩摩公國、大摩拉維亞公國,直至11世紀開始分道揚鑣,捷克地區嘅波希米亞公國成為神聖羅馬帝國嘅一部分,而斯洛伐克就成為匈牙利王國一部分。1867年,奧地利同匈牙利組成奧匈帝國,捷克同斯洛伐克先至重聚。

喺一戰前,斯洛伐克就一直受到匈牙利嘅壓迫,斯洛伐克人唔希望自己嘅文化消失,於是就爭取脫離匈牙利,而捷克同斯洛伐克相鄰,捷克同樣希望脫離奧地利,雙方就開始互相支持,爭取脫離奧匈帝國。喺一戰期間,捷克同斯洛伐克人見到奧匈帝國出現敗勢,認為係機會爭取獨立,於是佢哋就對外提出呢個構想,捷克同斯洛伐克兩個族群嘅代表喺1918年簽署《匹茲堡協議》,表明同意組建捷克斯洛伐克,脫離奧匈帝國;而奧匈帝國戰敗之後,美、英、法等國家亦先後承認捷克斯洛伐克呢個新國家。

原圖取自網絡。