依家香港上緊一部講述二戰期間美日中途島海戰嘅電影，講起故事背景，就唔可以唔提下當年日本偷襲珍珠港事件。喺1941年12月7號，即係今日，日本派戰機偷襲位於美國夏威夷珍珠港嘅美國太平洋艦隊基地，導致20艘美國軍艦被炸沉、300多架飛機被擊毀，約2400名美國軍民死亡，呢次偷襲可以話直接觸發美國向日本開戰，發動太平洋戰爭，從而扭轉第二次世界大戰局勢，亦被視為日本最終戰敗埋下伏線。

當時美國仍然未正式同日本開戰，但就透過唔同方式援助中國，1940年又向日本實施戰略物資禁運，不利於日本响亞洲嘅戰略擴張，當時日本聯合艦隊司令長官山本五十六大將就認為，日本難免要同美國開戰，但若然正面開戰，日本勢必付出唔少代價，於是策劃咗呢次偷襲行動，試圖摧毀美軍艦隊作戰力量。最終呢次偷襲，成功摧毀咗美軍唔少嘅軍艦同戰機，但惟獨美軍兩艘航空母艦「企業號」同「列星頓號」當時唔喺珍珠港停泊，逃過一劫，美軍之後就用呢兩艘航空母艦部署反擊。

有分析認為，日本偷襲珍珠港事件徹底激怒咗美國，揭開咗太平洋戰爭嘅序幕，但同時亦都可以話日本為自己種下咗戰敗嘅禍根。珍珠港事件之後，美國隨即對日宣戰，至1945年8月，美國更接連向日本廣島、長崎投放兩粒原子彈，直接令日本宣佈無條件投降，結束二次世界大戰。

原圖嚟自新華社。