阿史都講咗唔少「一帶一路」國家嘅風土民情歷史文化之類,又講返轉頭,中國呢幾年係咁講「一帶一路」,講緊可以話係未來中國响外國舞台上嘅發展藍圖,咁其實中國有乜著數呢?咁當中有無啲乜嘢隱憂呢?阿史就搵咗一個地方嚟講下。

南亞國家巴基斯坦有一個城市叫瓜達爾,呢個城市位於巴基斯坦西南部嘅俾路支省,响上世紀九十年代,巴基斯坦已經開始設備發展瓜達爾港嘅計劃,2002年正式動工,最初係建設同營運權係由新加坡國際港務集團持有,但响2013年巴基斯坦政府將建設同營運權交俾中國海外港口控股有限公司。

咁呢個城市有乜特別呢?瓜達爾市有一個深水港,而城市係位於霍爾木兹海峽附近,即係好近波斯灣。而中國就係想利用瓜達爾市同中巴兩國合作發展嘅經濟走廊,成為中國西部一個「出海途徑」。呢樣嘢對中國而言係極為重要,因為以往中國嘅石油同貨運大部分都要繞道馬六甲海峽同南海,航程時間長之餘仲會受到沿線國家牽制。所以,瓜達爾港同「中巴經濟走廊」打通後,從巴基斯坦西部到新疆喀什只需3500公里,比南海舊航道12000公里短得多。最重要嘅係,瓜達爾港臨近中東呢個主要石油產地,對未來中國能源戰略係有重大意義。

聽落呢個計劃咁完美,係咪無隱憂呢?其實中國推動「一帶一路」國策好多時都會遇到一個問題,就係呢啲國家政局同社會不穩。好似瓜達爾港位處嘅俾路支省,就曾經有伊斯蘭國响個度發動恐襲,當地官員講過,襲擊有部分係試圖破壞中國响當地嘅投資項目。