上個禮拜發展局公佈，將景賢里、芳園書室、大潭篤原水抽水站員工宿舍群同霍米園納入新一期活化歷史建築伙伴計劃，呢四個歷史建築之後會接受非牟利機構申請，以社會企業形式營運。其實芳園書室之前曾經活化過，但之後因人流減少而停止營運，今次已經係芳園書室第三次納入活化歷史建築伙伴計劃。

芳園書室位於馬灣田寮村，建於1900年之前，前身為「陳氏書齋」（私塾），上世紀20至30年代重建為西式建築，易名為「芳園書室」；喺日佔時期，日軍曾短暫進駐書室；戰後書室重新開放，係馬灣唯一保留嘅戰前小學。昔日馬灣陸路交通不便，芳園書室作為馬灣唯一嘅一間學校，當時唔少學生會從陰澳坐小艇嚟返學；為應付當地一帶不斷增加嘅學生人數，及至1956年，芳園書室西面興建咗馬灣公立芳園學校；舊校別稱大芳園，新校則別稱小芳園。

原圖嚟自政府文物保育網站。