近年嚟，大台唔少演員離巢嘅離巢，北上嘅北上，電視劇睇嚟睇去都係嗰班人，難免會令人回味以前香港電視界人才濟濟嘅年代。舊時嘅電視劇裡面，有唔少演員都係演開粵語長片嘅，個個好戲，好有睇頭。之前同大家講過粵語片著名演員吳楚帆、曹達華，今日就同大家介紹呢位有「千面小生」之稱嘅張瑛。

張瑛原名張益生，曾於華仁書院就讀，因喺家中排第十四，人稱「十四哥」。張瑛嘅爸爸係做藥材生意嘅，但張瑛對藥材就一啲興趣都無，反而醉心演戲。佢由特約演員做起，直至後嚟被大老倌薛覺先賞識，擔正主演《蝴蝶夫人》。當年呢齣電影大受歡迎，張瑛嘅事業亦因此有起色，陸續演出《上海火線後》、《人海淚痕》、《夜上海》等經典影片，令佢喺繼吳楚帆之後，贏到「華南影帝」嘅稱號。

不過好事多磨，正當張瑛事業發展正盛之際，香港淪陷，張瑛同其他演員被逼逃往桂林，直到戰後先重返香港，繼續演藝事業。由無綫到麗的，張瑛曾拍過唔少好戲，戲路亦比較多變，無論係《天蠶變》嘅正直掌門人，定係《同居》入面嘅鹹濕伯父，張瑛全部都演得好到位，簡直係遊刃有餘，所以難怪有「千面小生」之稱。

原圖嚟自微博。