之前講開前日本首相中曾根康弘,今日繼續講講另一位對中日關係發展有重要作用嘅日本前首相田中角榮。田中角榮係維新元老之後第一個無大學學位嘅首相,上任之初,佢嘅民意支持度高達62%,加上勢力龐大,影響咗日本政壇十幾年。除此之外,田中角榮仲係新中國成立之後,首位到訪中國嘅日本首相。佢1972年訪華期間,兩國政府發表《中日聯合聲明》,由此開啟咗中日邦交正常化進程。

田中角榮出身新瀉鄉下,父親生意失敗之後流連競馬,令田中角榮細細個就要揹起養家嘅重擔。亦因此,雖然田中角榮嘅讀書成績唔錯,但佢就無選擇繼續升學,而係早啲出嚟社會工作養家。田中角榮憑住自己嘅才能同眼光,喺土地營建事業上賺咗唔少錢,呢種「掘金」能力亦幫助佢日後打入政治界。

由當選眾議員開始,田中角榮嘅政壇之路都算順利,並且喺1972年做埋首相。喺同年9月,田中角榮訪問中國,同時任國家領導人毛澤東、周恩來會面,當時,毛澤東仲將《楚辭集注》送俾田中角榮做禮物添。兩國政府隨後發表《中日聯合聲明》,實現中日邦交正常化。其實田中角榮出任日本首相嘅時間唔長,只有短短兩年幾時間,但對於中日兩國關係嘅發展就起到好大嘅作用。

圖為田中角榮訪華時,與毛澤東會面。原圖嚟自人民網。