就嚟到聖誕節，呢個節日應該係充滿歡樂，但喺78年前，香港人就經歷咗一個慘痛嘅「黑色聖誕」，並且自此進入咗侵華日軍統治香港嘅三年零八個月「黑暗歲月」。

一位當年參加東江縱隊嘅老戰士就憶述，1941年12月初，香港原本充滿住節日氣氛，百貨公司嘅櫥窗裡面都已經擺放咗「聖誕老人」。但去到8號清晨，港島東北角突然傳嚟飛機呼嘯聲，之後香港就響起空襲警報聲，「我們知道，戰爭已經開始了。」1941年12月25日，亦即係果年嘅聖誕節當日，香港經過18日嘅保衞戰之後，終告失守，時任港督楊慕琦宣布投降。

其實香港戰事開打之後，當年位於赤柱嘅聖士提反書院大樓就被改作戰地醫院。去到25號呢一日，150名日軍闖入醫院，將當時喺入面嘅英籍、印度籍及加拿大籍傷兵，以及部分醫護人員、書院職員殺死。據聞當時日本國內仲不斷播報日軍「攻克香港」嘅消息。

之後，佔領香港嘅日軍由灣仔莊士敦道長驅直入，日軍亦開始肆無忌憚殘害香港市民，甚至去到醫院強姦護士、女病人。據宜家已經90幾歲嘅何伯憶述，當年嘅佐敦京士柏近伊利沙伯醫院同天光道一帶，係日軍處決港人嘅「萬人坑」。日軍為咗慳子彈，直接要人跪喺地下，然後用槍頭一刺、一推，上一秒仲活生生嘅人就跌入萬人坑裡面，認真殘忍。

隨住年月流逝，經歷過香港呢段黑暗歲月嘅「過來人」依家都已經慢慢老去或者已經離世，但阿史就覺得，唔可以畀呢段歷史真相消失。其實作為後生一輩，我哋銘記歷史並唔係為咗延續仇恨，而係為咗明白今日嘅來之不易，然後加倍珍惜。

圖為由太古船塢登上港島嘅日軍，原圖嚟自照片中國。