近年唔少人放假都會上深圳玩吓,不過唔知大家知唔知,深圳仲有個別名叫做「鵬城」㗎喎。深圳「鵬城」呢個名係源自位於深圳龍崗區、曾經係明清兩代中國南部海防軍事要塞嘅大鵬所城。

喺明朝建國初年,因為廣東係南方最後歸降嘅地區,所以當時海上治安非常差、倭寇橫行,有唔少倭寇勾結土豪、奸商、流氓、海盜,嚟到中國海岸走私、燒殺搶掠。於是明朝開國皇帝朱元璋就實施海禁,並且喺海岸修建長城,設置「九衛二十九所」。而大鵬所城就係其中一所,當時由一位名不見經傳嘅千戶(低級軍官)張斌响洪武二十七年(1394年)建造。

大鵬所城呈方形布局,城牆由麻石同青磚砌成,牆基寬5米、牆寬2米、高6米,城牆總長大約1200米,設有東、西、南、北四個城門,城外東、南、西三面環繞住一條深3米、寬5米嘅護城河。建成之後,大鵬所城經歷過多次戰火同天災嘅破壞,亦做過多次修繕工作,現時除咗北門喺萬曆年間被堵塞,大鵬所城仍然保留東、南、西三門同東北部分城牆。喺1989年,廣東省政府就將大鵬所城列為「省級文物保護單位」,有效保護及管理大鵬所城。

原圖取自大公報。