香港樂壇天后梅艷芳已經離開咗我哋16年,喺佢演藝生涯之中一共推出咗超過30張唱片、參與演出約40部電影;形象百變、獲獎無數,係香港演藝界嘅代表人物之一。梅艷芳唱得又演得,創造咗好多經典,旁人難以企及,但佢就有一個好大嘅遺憾,就係一生未結過婚,無兒無女。

梅豔芳早喺18歲嗰年,就由歌唱比賽中脫穎而出,更憑演唱《IQ 博士》主題曲打響名堂。之後,梅豔芳仲進軍日本歌壇,一舉奪得東京音樂節嘅「亞洲特別獎」同「東京電視獎」,可謂少年成名。而佢嘅第二張唱片《赤色梅艷芳》,更創下當年5張白金唱片銷量、入選年度十大金曲,自此一炮而紅。隨後,佢陸續推出經典作品《交出我的心》、《似水流年》、《壞女孩》、《將冰山劈開》等,更創下最年輕女歌手入主紅館舉行個人演唱會同埋擁有最多演唱會場數嘅紀錄。梅豔芳唔單止唱得,仲好演得,佢於1987年憑《胭脂扣》獲得金馬獎、香港電影金像獎同亞太影展嘅最佳女主角。佢嘅戲路亦不限於飾演女性,反串男角亦一樣好有睇頭,例如喺《川島芳子》、《鍾無豔》入面嘅演出。

梅豔芳之所以咁快走紅,並唔係多得幸運女神眷顧,而係歸功於佢入行前嘅13年舞台經驗。梅艷芳嘅父親早逝,母親帶住佢同幾個兄弟姐妹創辦「錦霞歌舞劇團」,年紀細細嘅梅豔芳就要出入唔同場所唱歌表演。雖然長大後事業有成,但梅豔芳同家人嘅感情疏離,令佢更加渴望結婚生子,組織自己嘅家庭。可惜事與願違,梅豔芳雖然有過幾段感情,但最終都無開花結果,成為佢生前最大嘅遺憾。

原圖嚟自大公。