今日係2020年1月1日元旦日，阿史先祝各位史友元旦快樂，新嘅一年有好嘅開始。

1月1日係一年嘅新開始，自然唔少歷史大事都响呢日發生。响108年前嘅1月1日，即1912年嘅元旦，中國歷史上一件相當重要嘅事發生咗，就係中華民國成立，孫中山先生响南京總統府宣誓就任臨時大總統。

講返歷史先，响1911年武昌起義成功後，全國各省相繼宣佈獨立，早在1911年12月2日，各省代表都已經由武漢移駐南京。到咗1912年嘅元旦，孫中山就喺原本屬於兩江總督署嘅地方成立臨時大總統府，即係後來嘅南京總統府。

响1月1日就職嘅上午，各省代表包括湯爾和、王寵惠、胡漢民、宋耀如，以及政府軍事顧問荷馬李等人，聯同孫中山先生由上海北站出發，沿滬寧鐵路北上到南京。據講當時軍民聚集各站熱情迎送，「蘇州、常州、鎮江等站迎送者逾萬」，列車直到下午5點先抵達南京。臨時大總統就職典禮到晚上11點先開始，响各省代表、各軍將領、各國領事見證下，孫中山先生宣誓就任臨時大總統。

雖然中華民國响1912年宣告成立，但當時滿清政府仍然存在，結果出現咗南北政權對峙嘅局面。呢個情況直到1912年2月隆裕太后頒降懿旨，宣統帝退位，滿清政權嘅統治先正式結束。

原圖取自網絡