今日係林保全嘅死忌,阿史就想介紹多啲保全叔嘅事。作為香港其中一位著名嘅配音員,佢參與過(即配音)嘅作品多不勝數。

保全叔配音經驗豐富,一生聲演過唔少經典角色,佢既係電影配音時代洪金寶及傅聲、內地演員王剛、台灣演員趙舜以及佐治·古尼嘅常任配音員,其中大哥大洪金寶當年更指定要佢做專屬配音員,認真厲害。

而電視劇同動畫嘅時代,又飾演過《鐵齒銅牙紀曉嵐》系列嘅和珅、《足球小將》嘅林源三、《成語動畫廊》嘅熊貓博士、《天空戰記》嘅修羅頓。但講到最深入民心,就一定數到叮噹(即哆啦A夢)呢個卡通角色。

保全叔喺1980年開始配演《叮噹》(即《哆啦A夢》),一配就配咗超過三十年,亦係係香港動畫配音員入面配音時間最長嘅一位。對於配叮噹,保全叔自己就曾經分享過,聲演叮噹其實很「嘥氣」,因為叮噹嘅日本原聲係由女配音員聲演,聲音較尖,所以佢配嘅時候都唔可以差太遠,都係需要用較尖嘅聲音嚟配。保全叔嘅配音曾經傳到返日本,連日本網民都估唔到原來香港版叮噹係由由男性配音。

「叮噹可否不要老 伴我長高」是《青春常駐》當中嘅一句歌詞,經常被用作懷念保全叔,《叮噹》(即《哆啦A夢》)實在帶俾香港人太多美好嘅回憶,。叮噹亦可以話係最能代表保全叔嘅卡通角色,唔少香港人都將叮噹同保全叔劃上等號。無論係叮噹,抑或保全叔嘅聲音,都稱得上係陪伴幾代香港人成長。而保全叔亦用《哆啦A夢》同大家「告別」,响林保全遺作《STAND BY ME:多啦A夢3D》中,當年預告就出咗一句好催淚嘅說話「我唔可以再留喺度,真係要走喇!」

講開又講,《叮噹》90年代嘅配音五人組,聲演「大雄」嘅盧素娟响2006年因腸癌病逝,「叮噹」林保全响2015年亦都離世,就只係得翻「技安」(現稱「胖虎」」、「阿福」(現稱「小夫」)同埋靜宜(現稱「靜香」)。

圖片來源: 網絡