和尚,即係出家人,理應斬斷七情六慾,但因乜解究咁悲情,連和尚都要搞到跳海呢?原來「和尚跳海」係上世紀茶記入面嘅一杯飲品,趁未開估之前,史友們不妨一齊諗下到底係邊款?


如果史友你都係未估到,好大可能你真係好少去舊式茶記。「和尚跳海」其實就係一款冇乜加工過嘅飲品—滾水蛋。由於以前香港生活環境比較貧困,基層市民每日都需要有一個有營養嘅早餐,滾水蛋當然就係一個好選擇。咁點解滾水蛋會被叫做「和尚跳海」?原來一杯滾水加隻雞蛋再加白砂糖,當生雞蛋放滾水「跳海」果一刻,蛋白喺滾水入面化開並且慢慢熟透嘅情形,就好似和尚件袈裟飄下飄下咁,至於個蛋黃,就似和尚個光頭,因此得名「和尚跳海」。


雖然呢味飲品簡單廉價,但基本上已經好難再喺茶餐廳飲到,要試味真係要自己落手落腳喇!


圖片嚟自網絡