喺上世紀50至70年代期間,港英政府就曾經興建多個大型水塘,包括大型嘅水務設施船灣淡水湖,但就因為工業發展同埋人口暴漲嘅因素令到水量仍然供不應求,甚至喺1963至1964年期間爆發水荒問題,需要四天供一次水限制用水量。


有見及此,當時政府就開始構思興建一個同船灣淡水湖類近嘅大型水庫,而呢個構思就喺1969年1月4日,即51年前嘅今日,正式拍板落實興建,水庫最終選址位處西貢半島南岸與糧船灣洲之間。


呢個大型水庫曾經想命名為糧船灣淡水湖,但就因為驚同船灣淡水湖撞名,索性就以「水庫」為名。由於水庫範圍內有一條萬宜村,所水庫嘅中文名就叫做萬宜水庫喇!


萬宜水庫建造工程由1971年正式開始,歷時7年,耗資超過13.5億港元。到底呢個水庫為香港儲起幾多淡水呢?據了解萬宜水庫可以容納到600億加侖食水,接近係全港50%嘅儲水量。至於呢個水庫建造嘅方式亦都相當新穎,先係由官門東西兩邊加建堤壩,東壩長1,593呎,高348呎;西壩就長2,470呎,高333呎,再將壩入面嘅海水抽出,引入淡水。而萬宜水庫巴閉之處,就係工程係全球首個以大壩圍封海岸方式而建成嘅水庫。聽落好似好簡單,但就足足用咗七年時間興建。


圖片嚟自網絡