阿史之前都介紹過，响2020年1月1日起，歐洲國家荷蘭就將統一改用正式國名「Netherlands」（尼德蘭），並停止沿用咗廿幾年嘅「Holland」（荷蘭）呢個名稱。而香港嘅網絡世界，就將呢件事同藝人陳百祥扯上關係，因為佢有個花名，叫做「荷蘭叻」。

陳百祥外號叫阿叻，相信都無乜幾個香港人唔知，呢位著名藝人一直係阿史嘅偶像，因為佢真係演活咗一啲牙擦擦、貪小便宜又帶幾份抵死嘅丑角，响香港真係無幾多位藝人演呢類角色可以演得咁出色。好喇！講返正題，陳百祥之所以叫阿叻，唔係因為佢好叻（呢一點係佢自己講），而係來自佢個英文名Natalis，因為呢個名第一個發音同廣東話「叻」字相近，所以佢就有咁嘅外號。至於佢同荷蘭有乜關係呢？其實係因為佢多年嚟都係荷蘭國家足球隊嘅忠實支持者，佢自己都話由告魯夫年代到依家都係捧荷蘭隊，就係咁佢就有咗荷蘭叻呢個外號喇！不過，依家唔少人鍾意叫佢呢個名，都係因為「荷蘭」二字似粗口諧音......

原圖係電視截圖