站在大丸前？原來大丸都冇咗成二十幾年

年紀輕嘅史友可能未必知大丸係啲乜， Twin《下一站天后》都有唱：「站在大丸前，細細看看我的路」，到底大丸又响邊度，依家又變成點呢？

《下一站天后》其實就係2003年寫嘅，大丸其實早喺1998年結束營業。大丸，即係首間响香港開業嘅日資百貨公司，曾經係銅鑼灣一個重要地標，小巴牌，小巴總站直頭就用「灣仔大丸」命名。當時祟光百貨都仲未嚟到香港，上世紀50年代，喺銅鑼灣大地主利希慎家族同埋華商劉火炎促使之下，日本大丸集團同張祝珊家族合資喺1960年11月3日開設百貨公司，行中高檔路線，開業第一日就已經引嚟十萬人入場。

大丸百貨當年就選址記利佐治街同百德新街交界嘅華登大廈地下，當時唔單止係引入日本百貨，仲係要員工學習埋日本禮儀，一改百貨公司嘅傳統作風，亦都因為咁令到香港人願意嘗試買日本貨品。