之前阿史介紹北京故宮唔摸得石獅傳說,有史友就留言問可唔可介紹多啲故宮嘅有趣事,史友叫到自然無問題啦!


記得以前讀書個陣,教古代文化嘅老師就講過,香港人去到故宮通常係咁話「大」,「好大」,之後去各個殿影相,最緊要就係去睇珍妃井。但佢話去之前故宮了解嘅佈局,去參觀故宮個陣就會另一番體會。好似故宮嘅佈局,其實就反映咗「五行」思想,單係建築用色就可以反映出嚟。五行係中國古代哲學嘅一套系統觀,古人將宇宙萬物劃分成木、火、土、金、水五大類,統稱「五行」。按漢代《春秋繁露》記載:左青龍(木),右白虎(金),前朱雀(火),後玄武(水),中央為土。


如果我哋好簡單咁以呢套系統套入故宮,就會好易明白係乜嘢一回事。故宮中央位置為太和殿、中和殿同保和殿,合稱三大殿,紅牆黃瓦,屋頂用黃色,黄色屬土,代表天子皇權,亦係故宮核心所在。紅屬火,火生土,紅牆利土,有助鞏固皇權。從三大殿面朝南方,左手邊(即東面)為建築物屋頂用綠色,因為綠色屬木;背後(即北面)較多樹木種植,因水生土,而北面嘅文淵閣,用黑瓦黑牆,黑色屬水,水可剋火,有利藏書。至於三大殿巿朝南正前方的天安門至端門均唔種樹,因為朱雀(南方)屬火,種植就唔係太多。故宮城內有條金水河,從內城西邊熙和門引入,再出至東邊協和門,呢條河由西邊入城,正正係白虎位,所以叫金水河。


上面都只係小部分例子,史友們應該知得更多,唔好收收埋埋喇!快啲留言同大家分享下。


圖片嚟自阿史