早兩日阿史介紹劉丹個陣,就用咗一張佢演洪七公嘅經典劇照。劉丹演洪七公呢個角色可以話係深入民心,其實,唔單止洪七公,大台响1983年播嘅《射鵰英雄傳》都係家傳戶曉,經典中嘅經典。


83年版嘅《射鵰英雄傳》 ,男女主角分別係黃日華同翁美玲,黃日華响劇中扮演戇直嘅郭靖可以話係入形入格,而翁美玲演嘅黃蓉就更加不得了,唔少人都話至今都未有人超越到佢呢個「俏黃蓉」。至於東邪西毒南帝北丐四大高手,分別由曾江、楊澤霖、劉兆銘同劉丹飾演,成班都係好戲之人。但講到搶鏡,就一定係秦煌演嘅老頑童周伯通,個種生鬼又係令人難忘。


補返一句,電視劇《射鵰英雄傳》係改編至金庸同名小說,當時呢套劇一出收視相當強勁,甚至高達到99%收視率,嘩!真係誇張到你唔信。


圖片嚟自網絡