關於吉慶圍嘅歷史，相信各位史友都好熟悉。新界氏族响新界六日戰入面就作出咗慘烈嘅犧牲，而見證住呢段歷史嘅，就有一道鐵門。

故事發生喺1899年4月，當時殖民地政府按照《展拓香港界址專條》逐步接管新界，但錦田嘅居民對呢件事並唔知情，既擔心前途，又唔想被英國人管治，於是就以屏山鄧氏為首、加埋廈村鄉、十八鄉、大埔七約呢班氏族，展開一場新界六日戰。由於裝備上嘅差距，英軍一人輕傷，但新界氏族就死咗500人。

戰敗嘅新界氏族一度走返入吉慶圍，嘗試用鐵門、圍牆同埋護河抵抗，英軍無計可施之下，就只好用重炮炸開圍牆，仲拎埋道鐵門番英國做戰利品。鐵門被帶走，錦田鄧氏幾十年嚟心入面都念念不忘，但直到1924年先有族人鄧伯裘向殖民地政府提呢件舊事，好快當時嘅總督司徒拔知道咗，就向英廷請求歸還鐵門。

鐵門最尾响愛爾蘭搵番，1925年5月26日重新裝番，當時司徒拔仲係親自入嚟開幕啟用。之不過，咁多年嚟都有人提出，還番嚟嘅呢道鐵門兩邊粗幼唔同，並唔係原先果對，其中一邊有可能係來自同樣被拆鐵門嘅錦田泰康圍，係真係假，就真係要等專家解答。

圖片嚟自網絡