瑞士糖對阿史嚟講真係由細食到大嘅糖,一直都以為「瑞士糖」只係一個名,但原來呢隻糖曾經真係來自瑞士。

 

時間番到1826年,當時有個叫做Philippe Suchard嘅商人,佢係做糖果師出身,但機緣巧合之下開設咗朱古力廠,直到1883年為止,瑞士有一半嘅朱古力都係由佢間廠整出嚟,真係威水。

 

點知去到第一次世界大戰果陣,好景不常,朱古力變得冇咁受歡迎。正所謂「窮則變」,賣朱古力唔好搵,不如做翻老本行賣下糖。於是,一粒由瑞士人响瑞士生產嘅糖就出現喇。由於瑞士糖甜得嚟又有咬口,當時歐洲人一下子就接受咗呢隻糖。1973年係瑞士糖賣嚟亞洲嘅年份,呢位商人從來冇諗過亞洲嘅銷情會咁激烈

 

去到90年代,瑞士糖威到畀卡夫收購埋,冇幾耐就轉手去到箭牌,咁當然產地亦都唔再係瑞士,嚟自瑞士嘅瑞士糖就再冇呢支歌仔唱。

 

原圖嚟自網絡