英國人「封鎮」應對黑死病？

近期新型冠狀病毒疫情有擴散情況，各地政府都用盡方法阻止疫情。依家科技發達，資訊流通量高，應對疫情都咁手忙腳亂，咁响古時發生疫情又可以點呢？

最近內地網絡界瘋傳一個英國歷史故事，阿史可以同大家分享一下。1665年嘅夏天，黑死病响英國爆發，黑死病即係鼠疫，呢場疫症响英國南部蔓延，當時已經有人擔心會蔓延到北部。响英國中部一個交通補給點亞姆村，亦因為一個倫敦商人而令條村出現疫症。面對瘟疫來襲，村中牧師就召集村民商討，話一係撤離，但疫症就會蔓延到北部地區，一係就留村實行隔離，阻正疫情向北蔓延，但代價就係可能全村嘅人都因此染病而死亡。結果村民就選擇留村隔離，村民响村莊外圍用石頭壘起一圈圍牆，結果隔離咗嘅村民好多人都染病死亡，據統計344名村民中有267人死亡。經過一年多嘅時候，黑死病疫情消失，但亦因為亞姆村守住咗，令英格蘭北部地區無受到疫情影響。

後嚟英國國王查理二世知道亞姆村村民嘅事蹟而大為感動，歌頌村民嘅英勇舉動，村民亦被人稱許為「賢者善人」，呢個故事仲寫入咗英國教科書當中。