胭脂扣 超經典愛情港產片

每到二月，情人節同元宵節氣氛就會好濃厚，阿史一如以往會响二月頭為史友介紹一啲經典愛情電影，呢啲電影唔少都係經典中嘅經典，今年打頭炮嘅就係阿史超鍾意嘅《胭脂扣》。

《胭脂扣》故事係以上世紀二三十年代香港上環西環一帶做背景，講嘅係十二少（張國榮飾）同妓女如花（梅艷芳飾）嘅愛情故事，其實刻劃嘅係南北行人同塘西妓女嘅命運。故事大概係講十二少同相戀，之後二人殉情自殺，如花之後成為女鬼，為咗搵十二少而返回人間，得到永定（萬梓良飾）同楚絹（朱寶意飾）幫助之下，如花最後搵返當年自殺未遂嘅十二少，仲將定情嘅胭脂扣歸還俾佢。

呢套戲除咗留意哥哥同梅姐嘅精湛演技外，亦可以當係認識香港百幾年前南北行同塘西風月嘅歷史。阿史以前都介紹過，石塘咀至西環一帶以前係紅燈區，南北行商人會過個邊娛樂消遣，名乎其實係燒金窩。至於當年有無啲好似十二少咁嘅敗家少爺呢？有就應該有，不過應該都係名不見經傳個隻。