上次介紹咗民初鄉土劇《情濃大地》,今次就介紹九十年代末另一套經典民初鄉土劇,叫《茶是故鄉濃》。套劇係講方有為(又稱鵪鶉仔,林家棟飾)响勤奮重建家族茶莊事業嘅故事,故事發展其實同《情濃大地》類似,不過故事主軸就圍繞到當地兩大茶園家族嘅恩怨情仇。到咗故事後段奸角榮耀祖(張松枝飾)要當地村民種罌粟成為咗故事高潮,至於結果係點?阿史都唔記得咗嚕。

 

林家棟演《茶是故鄉濃》個陣,可以話係佢响大台發展嘅高峰期,而女主角張可頤亦係個期當紅花旦,不過佢嘅少數民族就真係有啲怪。但阿史覺得呢套戲又係配角發揮好過兩位主角,最過癮應該係元華飾演嘅謝虎彪,奸奸哋後嚟又忠忠哋,同佢個樣相當配合。

 

講開又講,其實《情濃大地》同《茶是故鄉濃》係有啲關係,乜嘢關係呢?就係本來最初《茶是故鄉濃》個名係《情濃大地2》,因為題材類似,不過最後中文劇名就改咗,但英文名就都係叫Plain Love II(《情濃大地》叫Plain Love)。

 

原圖嚟自網絡