1894年鼠疫大爆發 海上有艘隔離船「海之家」

鼠疫係上世紀其中一種經常爆發嘅疫症，而响1894年嘅5月，上環太平山街、西營盤同埋堅尼地城一帶就爆發咗一場大型嘅鼠疫，由於呢幾個區域主要係華人聚居，人口密集之餘衛生環境亦都麻麻，令到疫症爆發就一發不可以收拾，呢場鼠疫奪去咗二千幾條人命。

鼠疫係一種人畜共通傳染病，患者最明顯嘅病徵係淋巴腺腫脹，而當時嘅政府就諗到用強硬政策，強行入屋將淋巴腺腫脹嘅人捉走隔離，至於放去邊度呢？原來海上有艘隔離船，叫做「海之家」。呢艘「海之家」，英文叫做「Hygeia」，即係健康女神，原本只係用嚟隔離天花病人，但嚟到1894年由於鼠疫更加嚴重，就直接用嚟做海上隔離醫院，停泊响維港。但由於呢隻船上採用西醫療法，當時嘅華人並唔接納呢一套。

鼠疫死者會被解剖屍體做研究，再加上各式各樣嘅流言，更加同華人「死留全屍」嘅思想有衝突，當年唔少患者寧願匿埋等死都唔想上「海之家」，冇幾耐「海之家」就被堅尼地城玻璃廠增設嘅臨時隔離醫院取替，用嚟專門接收華人患者。