1988年2月23日，香港政府批准小巴商會嘅要求，允許紅色同埋綠色公型小巴由原來嘅十四座改為十六座。响上世紀交通網絡仲未咁發達嘅時候，九巴營運嘅專利巴士服務並唔能夠全面覆蓋全港，特別係鄉郊地區，所以喺60年代政府就特別批准一種俗稱「階磚仔」嘅9座新界的士合法載客，但早期唔少司機都私下改做按程計價，就引嚟警方大力掃蕩。

而後來由於1967年巴士司機罷工嘅關係，令到一種非法嘅「白牌車」應運而成，當時就估計全港有成2100幾架白牌車，呢類車亦都係公共小巴嘅前身。為咗填補公共交通服務空缺，政府就終於响1969年畀白牌車合法化變成公共小巴，但就唔可以載客超過14個，於是呢類小巴又叫做「十四座」。叫咗差唔多二十年嘅「十四座」，當年今日就正式改做「十六座」，而去到上年，仲變埋「十九座」。

原圖嚟自網絡