近排大台就播緊《法證先鋒IV》，入面嘅演員唔同晒面口，阿史睇落又冇乜太大嘅感覺，反而比較懷念第一輯嘅《法證先鋒》。

呢部結合法證、法醫、重案組三方人耿去追查案件真相嘅時裝查案電視劇，响2006年推出，同樣係由梅小青監製。當年就搵咗好有親切感嘅歐陽震華、林文龍、蒙嘉慧及鍾嘉欣做男女主角。當年閒閒地收視已經有30點，去到大結局仲升到上43點，認真誇張。而就算事隔十年之後大台再响深宵重播，都創咗個紀錄，就係「深宵時段劇集重播首集收視記錄」，而呢個記錄冇幾耐之後就畀《法證先鋒II》打破咗。

故事情節阿史就特別記得下水道骸骨發現案同埋變態連環姦殺案，嚇到阿史咁多年都仲有畫面。當年呢套劇除咗畀人叫做無線嘅《101拘捕令》，仲有另外一個朵，就係叫做現代版嘅《洗冤錄》。點解呢？故事嘅題材差不多當然係其中一個原因，另一個原因就係，呢兩部劇嘅男主角都係歐陽震華同埋林文龍，仲唔係現代版？

原圖嚟自網絡