洗腦朱古力廣告 請等等我繽紛樂緊

前幾日阿史就同史友們介紹咗大跳眉舞嘅吉百利朱古力廣告，而當年同樣有另一個經典嘅朱古力廣告盛行。有幾經典？就係你會唔小心用埋佢啲台詞嚟覆朋友，阿史講緊嘅就係繽紛樂2007年嘅呢個街舞廣告。

「繽紛樂，脆一脆嘅威化、加上滑一滑嘅榛子醬，外脆內軟」史友們應該都聽唔少。同正統嘅朱古力唔同，健達繽紛樂其實係一種牛奶朱古力、榛果醬加上威化外層嘅食品。1990年喺意大利生產第一條，去到2004年就已經全球普及，真係唔簡單。

講返呢個廣告，大概係講緊兩team人喺度街舞battle緊，但就有兩位隊友偷偷地食繽紛樂食到忘晒型，仲叫人「請等等，我繽紛樂緊」。呢個廣告未必算得上好特別，但成句「請等等，我繽紛樂緊」對小朋友嚟講就相當洗腦，直到依家都仲聽過有人衝口而出。