提起汪建，可能有史友會諗起佢係第一位完成繪製中國人以及亞洲人基因組圖譜嘅人物，又或者一位五十六歲爬上珠穆朗瑪峰嘅男人，而阿史今次就想介紹下呢位「基因教父」喺兩次疫症背後所付出嘅努力。

汪建係全球最大基因檢測公司華大嘅創始人之一，早年就喺北京中醫藥大學、美國德州大學同埋華盛頓大學從事細胞因子、血管細胞研究，直到1994年返中國創建同生物科技公司，佢認為基因科技可以造福人類。

華為嘅始創人任正非就曾經形容汪建係一位「有爭議的神人」，原因唔單止係因為以往佢嘅成就，仲係關係到佢個人性格。喺2003年沙士爆發期間，廣東防治小組就舉行會議討論對策，汪建冇得到邀請就喬裝混入，仲大大聲話只要拎到病毒樣本，佢就可以解讀到結構，然後大家就可以進行疫苗研發。結果，喺三十六個鐘之後，佢同華大基因嘅團隊成功破解咗四株沙士病毒全基因組序列，仲捐出咗三十萬份試劑捐畀政府，係全球第一個公佈有關沙士病毒嘅試劑盒。

而嚟到今年，佢聽到「新冠肺炎可以人傳人」，「武漢封城」呢啲消息後，身為一位身家百億富豪親身同華大基因員工一齊入到武漢，用五日時間興建「火眼實驗室」。目的就係為咗提升病毒嘅檢測能力，直到三月，佢哋已經完成咗一百三十萬人份病毒試劑盒。

講開又講，呢位「基因教父」相信基因科技可以令人更長命，於是佢就為自己寫定墓誌銘「汪建：1954-2074，精采人生。」

原圖嚟自網絡