早幾日阿史介紹「及第粥」嘅時候就提到明朝狀元倫文敘,佢唔單止係翰林院修撰,之後仲官至經筵講官同埋升春坊右諭德兼侍講,學問同文學水平方面係無用置疑,但原來佢就曾經畀一班鄉坤質疑過。


相傳倫文敘有一日返到鄉下嘅屋企,鄉紳一早就聽過佢嘅大名,於是就搵佢去為收藏嘅蘇東坡真跡「百鳥歸巢圖」題詩。咁當時倫文敘就先寫上一句「天生一隻又一隻,三四五六七八隻」,睇到班鄉紳眼都突埋,因為佢地覺得呢句太普通喇!跟住倫文敘並無理佢地,繼續寫埋「鳳凰何少鳥何多?啄盡人間千萬石」。睇到呢度,就有鄉紳忍唔住問,到底呢首詩有咩咁特別呢?


原來要睇得明呢首詩,係要識得計數,當時倫文敘提到,一隻又一隻,數字上就係兩隻,而三乘四、五乘六再加埋七乘八,咪剛剛好係圖中嘅百鳥。鄉紳們知道咗當中嘅玄機之後,即時就大讚好詩好詩。


原圖嚟自網絡