早幾日《時代周刊》就發佈咗100位最具影響力女性人物榜嘅名單,當中就有一位中國近代出色嘅醫學研究員,佢就係第一位亞洲及華人女性喺自然科學類諾貝爾獎嘅得獎者,亦都係首位華人拎到諾貝爾生理學或醫學獎,真係認真犀利。


屠呦呦1930年出生喺浙江,1951年就考入咗北京大學醫學院,畢業之後就繼續做中藥同埋中西藥結合嘅研究,同時亦都做埋碩士生、博士生嘅導師。年少時曾患結核病,但呢件事反而令佢走上醫學路。佢被稱為「三無教授」,即係無博士學位、無海外留學經歷、無兩院院士頭銜,所以佢亦都係第一位喺中國接受教育並且進行研究工作得獎嘅諾貝爾醫學獎得主。


提起屠呦呦嘅成就,就當然係發現抗瘧藥「青蒿素」同埋「雙氫青蒿素」,就係因為呢項藥物嘅發明,救咗幾百萬人嘅命,仲幫咗唔少熱帶國家好似亞洲南部、非洲同埋南美嘅人改善佢哋嘅健康。同屠呦呦一齊獲獎嘅仲有William Cecil Campbell同埋大村智,三位都係因為「發展出針對一些最具毀滅性的寄生蟲疾病具有革命性作用的療法」而得獎,為人類嘅生存作出重大嘅貢獻。


原圖嚟自網絡