東華門叫做「鬼門」？

早兩日北京故宮傳出一單消息，就係話紫禁城嘅東華門就畀一架私家車撞咗埋去，而肇事司機目前已經被帶走調查，但有「鬼門」之稱嘅東華門，就至少有一粒門釘損壞。

東華門其實係紫禁城東門，喺明永樂十八年（1420年），早年係專門畀太子出入紫禁城，相當巴閉。同紫禁城其他嘅唔同，呢道門係級別上係低過另外三門：午門、西華門、神武門，所以佢嘅門釘亦都少一列。清朝初年，東華門亦都允許內閣官員同埋年事已高嘅一、二品大員出入。

而民間就流傳一個講法，話東華門係「鬼門」，原因係去到清朝嘅時候，呢道門就會用嚟畀「梓宮」出入，所謂「梓宮」就係君主、皇族，王爵嘅棺材。再加上午門、西華門、神武門嘅門釘數目都係九路九粒嘅，只有呢道門係八路九粒，內含有陰數，所以民間就直頭叫呢道門做「鬼門」。