全球新冠肺炎疫情持續,歐美地區好多國家感染人數不斷上升,唔少外國媒體都慢慢話原來中國响今次抗疫當中做得非常好。唔單止外媒,亦有外國元首話响今次疫情當中要感謝中國伸出援手,呢個國家就係歐洲嘅塞爾維亞。


講到中國同塞爾維亞,相信唔少史友都會記得1999年美軍轟炸中國駐南斯拉夫使館嘅事件。1990年代初,南斯拉夫解體,當中六個加盟國有四個宣佈獨立,剩低塞爾維亞同黑山兩國,响1992年4月重組成立南斯拉夫聯盟共和國,中國駐前南斯拉夫大使館改為駐南聯盟共和國大使館,中國駐前南斯拉夫大使改任駐南聯盟共和國大使。


1996年南斯拉夫爆發科索沃戰爭,中國响科索沃問題上係支持塞爾維亞。1999年由美國主導嘅北約正式介入戰爭當中,於南斯拉夫境內不斷進行轟炸。1999年當地時間5月7日夜間,北約嘅美國B-2轟炸機發射咗5枚飛彈,轟炸响塞爾維亞貝爾格萊德嘅中國駐南斯拉夫使館,造成3人死亡,多人受傷。事件震驚全球,唔少國家譴責北約同美國嘅行為,時任美國總統克林頓為此事件向時任國家領導人江澤民道歉。北約對事件嘅解釋係話誤炸,原因係用咗一份美國中央情報局過時嘅地圖,北約同美國都多次對事件表示遺憾同哀悼。但大部分中外媒體以及全球華人對呢個解釋唔多接受,世界各地華人掀起反美潮。最終响同年12月,中美就此次事件賠償問題達成協議,美國政府向中國政府支付2800萬美元賠款。


事件發生後,中國駐南斯拉夫大使館,即後嚟嘅中國駐塞爾維亞大使館歷年都會响當地舉辦悼念活動,事件過咗廿年,唔單止唔少中國人記得,塞爾維亞人都記得。


原圖嚟自網絡