第一個女公廁係由客家人爭取？

尋日就講到因為太平山街嘅鼠疫爆發，令到當時港府冇得唔正視衛生問題，終於喺上世紀初起咗第一個公共浴廁。可能有啲史友都會知道，第一個公共男廁早喺1867年就已經出現，咁女性用嘅公廁又係幾時出現呢？

答案係1880年，而呢個女公廁嘅位置就係灣仔嘅船街，到底點解女性用嘅公廁會足足遲咗十三年呢？原來男女比例有關。19世紀之前，香港男性人口嘅比率好高，於是早年所起嘅25個公廁都係起畀男性用，當中當然係存在住性別上嘅唔平等。

咁到底點解後來會有女廁出現呢？原來同一班客家女性有關。當時唔少基層嘅客家女性都係以揼石仔、挑擔為生，由於冇公廁嘅關係，就只可以返屋企如廁，費時失事。於是有客家社群留意到呢個情況，就要求政府幫手為婦女建個公廁，最尾就响1880年灣仔船街出現第一個女公廁。