提起廣東,唔少人都會第一時間諗起廣州,固然廣州係嶺南文化入面重要傳承地之一,但其實廣東歷史名城又點止呢一個,仲有肇慶啊!肇慶即係邊度呢,其實就係指緊珠江三角洲西部山地嘅丘陵區,佢個位置東北面就係清遠、東南就係佛山、西南係雲浮,而西北就係廣西。


肇慶算得上係嶺南文化發祥地之一,如果由考古學嘅角度出發,距離依家十四萬年前,呢個地方就已經有人類活動過嘅痕跡,當中仲曾經喺肇慶封開縣垌中岩發現過名為「垌中岩人」嘅古代人類化石同埋生活遺蹟,可以話成個粵西、甚至嶺南地區,最早發現到人類嘅地方就係喺肇慶。


呢個嶺南名郡喺秦朝之前就係百越族嘅居住地,隨後肇慶就先後畀秦始皇帝同埋漢武帝征服,响漢代到明清年間,肇慶就多次成為政治、經濟、文化嘅中心,地位真係舉足輕重。講開又講,其實肇慶最初係叫做端州、信安郡、高要郡等呢幾個名,但就去到宋徽宗嘅時候,親自幫呢個古城改名叫做「肇慶府」,後來呢個地方就叫做肇慶。


原圖嚟自網絡