早兩日就介紹過佛堂門嘅天后廟，有史友就想阿史講多啲關於天后嘅故事，咁就當然要由佢嘅真身開始介紹啦！喺唔同嘅廟宇入面，都會好容易見到一個頭戴鳳冠，身披紅衣、容貌祥和嘅女性，而呢個就係天后嘅法相。

天后，有「媽祖」、「亞禡」又或者「天妃」等嘅稱呼，係中國民間、甚至係東南亞嘅一個民間信仰，雖然佢有好多個名，但關於佢本名最統一嘅講法都係「林默娘」，咁到底佢又係點樣飛昇成仙呢，多年嚟就流傳住唔同嘅講法：

第一個講法就係，天后係喺北宋年間嘅福建莆田出世，因為出世去到滿月都未出過一句聲，所以就直頭叫做「默娘」。關於佢嘅童年並冇太多嘅記載，而去到十二歲嘅時候，默娘就遇到一個方士教導佢玄微秘法，去到十五歲嘅時候就已經可以幫人醫病同拯救海上遇難嘅漁民。而有一年，佢嘅爸爸同哥哥出海遇險，默娘最尾救返兄長而父親就已經過咗身，因為呢件事，默娘就被稱為孝女，二十八歲飛昇後，仲仍然幫助唔少海上遇險嘅人。

而第二個講法背景都係發生喺福建莆田，但就係因為唔鍾意講嘢而被叫做「默娘」，而呢次默娘就天生聰明過人，自小鑽研醫術，喺28歲嘅時候喺一次海上拯救船隻嘅過程入面，默娘就不幸被船杆打中頭部身亡。自此以後，佢就不斷顯靈，幫啲鄉親手救人。村民知道之後，為答謝佢嘅恩情就建廟供奉，慢慢就廣傳開去成為一個民間信仰。

到底邊個版本先係真，阿史就真係唔知，但有一個事實就係，天后已經發展成一個好重要嘅民間信仰，全港就曾經有三百幾間廟宇係有供奉天后，真係左近就有一個。

原圖嚟自網絡