現代，凡親有人做錯事，就會有人出嚟解釋同澄清返，呢個行為就會叫「解畫」。但原來喺上世紀嘅香港，「解畫」同「打更」、「倒夜香」一樣，都係一份職業嚟架！

時間返到上世紀初，香港慢慢出現娛樂事業，而當時就流行嘅當然就係電影啦！唔知真係未必知，當年最初上映嘅電影都係以默片為主。咩叫默片呢，就係冇配音、冇配樂、冇聲效嘅電影。呢個情況由1920年代去到1930年代都一樣，有少量嘅字幕就已經算得上好好。

但問題嚟喇，早期嘅電影乜都有啲，而香港市民當時嘅教育水平亦都唔高，唔識字嘅都大有人在，就算有字幕都未必明，更何況係默片呢？於是當年戲院入面就專門請咗一個名為「解畫佬」嘅職業，佢嘅工作就係喺播緊電影嘅時候解釋劇情。而據老一輩講返，當年戲院入面係專門有個類似鐵籠嘅位畀解畫佬坐，而當年係冇試映呢回事，同你解釋緊劇情嘅解畫佬，基本上都係第一次睇到同一套戲，所以你話呢份工係幾考急才同埋「爆肚」呢！

原圖嚟自網絡