早兩日就同史友們提到九廣鐵路嘅九龍總站遷站,而喺當年尖沙咀,曾經有過一種好特別嘅交通工具,叫做「嘩啦嘩啦」,其實就即係電船仔,佢嘅路線係由維多利亞港來往香港島同埋九龍半島,喺1972年海底隧道通車之前,係相當重要。

電船仔之所以叫做「嘩啦嘩啦」,係因為當推進器拍打水面嘅時候,會發出類似嘅聲。早喺1870年代,卜公碼頭同埋九龍公眾碼頭就已經有類似嘅服務,早年係用火船仔載客,嚟到20世紀初就換成電船。而講到嘩啦嘩啦最出名嘅兩間公司,就有1914年共和電船同埋1920年嘅民力電船,都係當年維港重要嘅海上交通。

但去到1923年同埋1933年,香港就分別出現咗油麻地小輪同埋天星小輪,嘩啦嘩啦就即時面對嚴峻嘅挑戰。咁到底呢啲電船仔係點樣生存落去呢?原來渡輪公司嘅服務時間係唔包括深夜,如果想深夜過海,就只有嘩啦嘩啦呢個選擇。而且喺返工放工嘅繁忙時間,嘩啦嘩啦都會接載唔少乘客,所以去到60年代仲有得做。但直到1972年海底隧道通車,嘩啦嘩啦基本上就只會出現喺香港仔同鴨脷洲喇。

原圖嚟自網絡