呢排香港人都好鍾意行山,而上得山多就會遇到馬騮。馬騮當然係野生動物,但原來以前就唔少人都偷偷地養,阿史就諗返起以前有一隻叫做「金鷹」嘅馬騮,佢同主人陳伯有過一段感動好多香港人嘅故事。

話說陳伯就係喺50年代開始喺九龍城街邊賣「陳標記小兒疳癪散」,當年註冊商標圖案就已經有一隻馬騮,「金鷹」就係陳伯第三代嘅賣藥拍檔,陳伯當年賣藥嘅時候,金鷹仲會喺隔離表演,人同馬騮之間嘅感情就係咁樣培養返嚟。

「金鷹」係一隻雌性獼恆河猴,原理上係受到《野生動物保護條例》管制。而喺2000年,漁護處就曾經以「禁止管有受保護野生動物為由」,喺陳伯身邊帶走金鷹,呢件事當時引起社會大眾熱烈討論,仲有唔少人都幫手求情。喺飽受輿論壓力之下,漁護署酌情處理呢件事,發出香港第一張飼養馬騮嘅牌照。

去到2004年,陳伯就過咗身,金鷹轉由陳伯個仔繼續照顧。去到2015年,金鷹亦都因為患病而無法醫治,以安樂死嘅手法終結生命。

原圖嚟自網絡