講完廣州十三行同埋「洋銀熔入水溝,長至一二里」嘅故事之後,有一個人就唔可以唔提,佢係清朝中葉嘅一個重要人物,佢叫做伍秉鑑。伍秉鑑係廣州十三行之一怡和行嘅行主,亦係三品頂戴花翎,佢出色嘅行商技巧,令到佢成為當時嘅世界首富。

伍秉鑑嘅家族以往係以茶葉買賣作為家業,傳到去佢手上嘅時候已經經歷五代。喺乾隆年間,原來嘅四口通商被轉為廣州一口通商,間接令到廣州十三行壟斷全國嘅對外貿易,而當時十三行嘅總商係由潘振承掌管嘅同文行,伍秉鑑嘅爸爸伍國瑩當時就喺入面做賬房會計。而經過一段時間,伍國瑩亦都有參與過一啲資產管理,同東印度公司亦都建立咗關係,當時就決定註冊為「官商」,拎咗伍秉鑑嘅乳名阿浩,直接叫做「伍浩官」。

伍國瑩開始行商,並且建立咗後來十三行之一嘅元順行,轉輾之下交咗畀二仔伍秉鈞,變咗做怡和行,後來就由伍秉鑑接手。1801年,伍秉鑑接怡和行之後,用咗5年時間就發展到同文行嘅水平,其後就拎埋英國公司羽紗銷售代理權,順勢做埋總商。對英國東印度公司嚟講,怡和行相當重要,既佔咗按近兩成嘅茶葉買賣,後來仲代理埋印度綿花買賣。

而講到伍秉鑑最重要嘅生意,就係通過佢義子鐵路大王約翰・福布斯嘅旗昌洋行,參與密西根中央鐵路、柏林敦同埋密蘇里河鐵路嘅投資。因為旗昌洋行嘅關係,怡和行唔少嘅商品都能夠賣到世界各地,為佢累積大量財富。

咁到底伍秉鑑有幾有錢呢?據講當時美國最有錢嘅人都只係得700萬墨西哥銀元,而估計伍秉鑑就有成2,600萬墨西哥銀元,認真誇張。

原圖嚟自網絡