呢排阿史就經過油麻地嘅天后廟,諗住祈個福拜下神,點知就畀阿史見到一張由發展局發出嘅文件,話根據古物古蹟條例,會將油麻地天后廟同埋鄰接嘅建築物建議升格為法定古蹟。

油麻地天后廟依家係一級歷史建築,由華人廟宇委員會負責管理,係九龍最大規模嘅天后廟。講開呢座古廟,喺油麻地仲係海邊嘅時候,由一班水上人家集資喺1865年興建,當時嘅天后古廟其實只係一座好細嘅廟宇,位置係喺北海街果邊。

而去到1870年,油麻地居民就決定重修呢座廟宇,但點知整好冇幾年,油麻地一帶就受到強烈的風災—1874年甲戌風災來襲,成座天后古廟被摧毀。於是,當地嘅居民只好喺重建完自己嘅居所之後嘅第二年,再次集資重建天后古廟,而去到1876年先揀好「廟南街」同「廟北街」交界重建,歷時14年去到1890年先完工。

雖然廟宇係經歷過重建,但好多珍貴嘅文物都保留到落嚟,就好似一對1860年嘅石獅、四次重修重建嘅廟碑同埋1888年銅鐘等。重建完嘅天后古廟面積同規模上都比以前更加大,先後就由廣華醫院、東華三院接管。話就話係天后廟,但今日再去呢個地方,其實都可以發現到有觀音樓、油麻地城隍廟等其他廟宇建築。

原圖嚟自網絡