1985年，基本法起草委員會同基本法諮詢委員會先後成立，成為香港《基本法》起草同諮詢嘅兩個重要組織。之前介紹咗基本法草委會，今次都要介紹下基本法諮委會。

基本法諮委會响1985年年底成立，負責响香港徵詢公眾對《基本法》草案嘅意見，委員會由180名委員組成，主任為安子介。首任秘書長是毛鈞年，其後由梁振英接任。委員來自社會唔同界別，由工商、金融、地產、司法、法律、專業、教育、傳媒、勞工、公務員、政見團體、學生、社會服務、街坊、社區、宗教等界別，當中連外籍人士同小商販都有，極具廣泛代表性。

諮委會當年嘅諮詢工作，可以話係香港有史以嚟時間最長、規模最大嘅諮詢。據諮委會秘書長梁振英憶述，當時諮委會秘書處三十名全職人員工作時間都係朝九晚九，1986年及1987年多次安排內地起草委員到香港聆聽各界意見，以及安排諮委到內地參觀考察。

為咗鼓勵香港市民响起草期間發聲提出意見，諮委會就搵廣告界名人紀文鳳策劃宣傳工作，响電台、電視台、報章宣傳，令廣大市民更關注《基本法》諮詢工作。另外，為咗照顧唔同需要嘅人，宣傳工作都有特別安排，好似凡有較重要嘅諮詢文件，就會為失明人士準備凸字版。

响1988年同1989年，草委會先後發布《基本法》徵求意見稿以及《基本法》（草案），兩次都印咗過百萬份全文文本，放响港九新界九百幾間銀行分行俾市民索取。諮委會收集各種意見同建議，隨後就向起草委員會提交香港市民對《基本法》（草案）徵求意見稿嘅報告。

原圖嚟自網絡