月溪法師金身不滅？

尋日就同史友們講到沙田嘅萬佛寺，而講到呢個地方，一定就要介紹創立呢座佛教建築群嘅傳奇人物—月溪法師。法師已經圓寂多年，而佢嘅金身依家仲供奉喺萬佛殿入面。大家都冇睇錯，確實係埋過入土而冇腐爛嘅肉身。

月溪法師出生喺1879年嘅浙江，本名吳心圓。生於富貴人家嘅月溪法師，早年喺上海讀書，去到19歲嘅突然有所感悟決定出家。出家剃度受戒係正常嘅事，而當時月溪法師唔單止咁，佢仲喺佛像面前燒咗自己嘅無名指同埋尾指，再喺心口點着四十八盞燈立誓，講明今世唔貪圖富貴、會苦心修禪、弘揚佛法，亦都係因為咁，佢後來被稱為「八指頭陀」。

自此以後，月溪法師一邊游化修行，一邊帶住七弦琴。而去到1938年，月溪法師嚟到香港開始籌備建設萬佛寺，並且喺1957年建成。喺1965年嘅一日，佢本身準備同弟子講解《圓覺經》，但就覺得自己壽元將盡，就吩咐弟子喺佢死後8個月撥土開龕，講完之後就端座圓寂。故事係真定假就冇人知，只係8個月之後法師嘅肉身都仲保存完整，據講表面仲有少少金黃色，後來就被包上紅布加漆鋪金，作為肉身菩薩供奉喺「萬佛殿」入面，亦係南方極為罕有不滅嘅肉身。