尋日阿史就同大家介紹到荃灣新市鎮。雖然係新市鎮,但呢個地方一啲都唔新,而且仲好有歷史,淨係講個名都有段故。

據講荃灣以前並唔係叫做荃灣,而係叫做「淺灣」。其實唔單止呢個名,十八世紀嘅荃灣仲因為有唔少海盜侵襲,就有埋「賊灣」、「海盜灣」呢啲名,於是新界人之間就流傳住一句「尋財路舊金山,尋死路去荃灣」。講返「淺灣」先,好地地點解會改名?原來係因為唔吉利。

呢個地方之所以叫做「淺灣」,原本係因為水淺,但後來村民就覺得「淺」字唔吉利,而且「龍游淺水遭蝦戲」,於是就通過一位晚清秀才楊國瑞向當時嘅港府反映,希望將「淺灣」改名做「全灣」。至於點解係「全灣」,就係因為「全」字通「荃」,喺楚辭入面就係一種香草,用嚟比喻君主;喺《莊子》入面又係指古時嘅捕魚工具,岩晒當時漁民農民聚居嘅「全灣」。而今日用緊嘅「荃灣」,就係後來再改嘅。

原圖嚟自網絡